හිටපු පොලිස්පති C. D. වික්රමරත්න හිසට වෙඩි තබා ගෙන මිය යයි..
හිටපු පොලිස්පතිවරයෙකු වන චන්දන දීපාල් වික්රමරත්න මිය ගොස් තිබේ. මෙය සියදිවි නසාගැනීමක් ලෙස සැක කරන බව පොලිසිය පවසයි.
මාරාන්තික වෙඩි තැබීමේ තුවාලයක් සහිතව හිටපු පොලිස්පතිවරයා ගේ සිරුර සොයා ගෙන ඇත්තේ අතුරුගිරියේ පිහිටි ඔහුගේ නිවස තුළ දී ය. හිසට සිදු වී ඇති මාරන්තික තුවාලය ඔහු විසින්ම සිදු කර ගත් එකක් බවත්, එය පුද්ගලික ගිනි අවියක් භාවිතා කර සිදු කර ඇති බවත් බලධාරීන් දැඩි ලෙස සැක කරයි.
කෙසේ වෙතත්, සිද්ධිය වටා ඇති නිශ්චිත තත්වයන් තහවුරු කර ගැනීම සඳහා අතුරුගිරිය පොලිසිය සහ විශේෂිත අධිකරණ වෛද්ය කණ්ඩායම් විසින් පුළුල් පරීක්ෂණයක් මේ වන විට ආරම්භ කර තිබේ.
C.D. වික්රමරත්න 1986 දී සහකාර පොලිස් අධිකාරීවරයෙකු (ASP) ලෙස ශ්රී ලංකා පොලිස් සේවයට සම්බන්ධ වී දශක තුනකට වැඩි කාලයක් පුරා පැවති වෘත්තීය ජීවිතය තුළ ප්රධාන මෙහෙයුම් විධාන ගණනාවක් දරා තිබේ. 2019 පාස්කු ඉරිදා ප්රහාරයෙන් පසු, ඔහු වැඩබලන පොලිස්පති ලෙස පත් කරන ලද අතර පසුව 35 වන පොලිස්පතිවරයා ලෙස තහවුරු කරන ලද අතර, 2023 අගභාගයේදී විශ්රාම යන තෙක් ඔහු එම තනතුර දැරීය.
දැනට සිදුවෙමින් පවතින පාස්කු ප්රහාරය පිළිබදව විමර්ශනයේ දී, මිය ගිය පොලිස්පතිවරයා සහ එවකට ආරක්ෂක අමාත්යාංශයේ රාජකාරීයේ යෙදී සිටි ලේකම්වරයෙකු ඇතුළු කිහිප දෙනෙකුම නුදුරේදී අත්අඩංගුවට ගැනීමට නියමිතව තිබූ බවත්, එම තොරතුරු දැන ගැනීමෙන් පසුව මෙම සියදිවි නසා ගැනීම සිදුවන්නට ඇති බවටත් අප වෙත ලැබෙන නිල නොවන ආරංචි මාර්ග සඳහන් කරයි.
මෙම මරණය සියදිවි නසා ගැනීමක් බවට මූලික තක්සේරුව යොමු වුවද, නිශ්චිත තොරතුරු ස්ථාපිත කරනු ලබන්නේ දැනට ක්රියාත්මක වන මහේස්ත්රාත් මරණ පරීක්ෂණය සහ පශ්චාත් මරණ පරීක්ෂණ අවසන් වූ පසුව පමණක් බව පොලිස් මාධ්ය ප්රකාශක කාර්යාල පෙන්වා දෙයි.
