ගාල්ලේ ට්‍රැෆික් පොලිස් නෝන්ඩි වෙලා...
ගාල්ල නගරයේ පැවැති වෙසක් කලාපයක ආවේක්ෂණ රාජකාරී අවසන් කර බූස්ස කඳවුරට යමින් සිටි යුධ හමුදා බුද්ධි අංශ නිලධාරීන් පිරිසක් ඉලක්ක කරගනිමින් 2025 මැයි 14 වන දින ගාල්ල පොලිසියේ නිලධාරීන් පිරිසක් වගකීම් විරහිතව සිදු කරන ලද අත්තනෝමතික ක්‍රියාවක් පිළිබඳව ගරු අධිකරණ තීන්දුවකින් අනාවරණය වී තිබේ.
යුද හමුදා බුද්ධි අංශ සාමාජිකයන් සිය අවේක්ෂණ රාජකාරි නිම කර හමුදාවට අයත් තුන් රෝද රථයෙන් කඳවුරට යමින් සිටියදී, ගාල්ල දිසා රථවාහන අංශයේ පොලිස් සැරයන් කිත්සිරි ඇතුළු පොලිස් කණ්ඩායමක් එම ත්‍රී රෝද රථයට ආදායම් බලපත්‍රයක් නොතිබීම සම්බන්ධයෙන් දඩ කොලයක් නිකුත් කරන ලද බව පැවසේ.
එහිදී යුද හමුදා වාහන සම්බන්ධයෙන් වූ 1955 ජුලි මස 08 වන දින ගැසට් පත්‍රයට අදාළ නිත්‍යනුකූල ලියකියවිලි හමුදාව විසින් අදාළ පොලිස් නිළධාරීන් දැනුවත් කළ ද ඔවුන් විසින් එම ලියකියවිලි නොසළකා හරිමින් කටයතු කර ඇති බව වාර්තා වේ.
පසු දින, එනම් මැයි 15 වන දින මේ දඩ කොලය සම්බන්ධයෙන් යුද හමුදාව ප්‍රධාන පොලිස් පරීක්ෂක සුජීව පොලිස් ස්ථානාධිපති ජයවීර හා එවකට ගාල්ල ඡ්‍යෙෂ්ඨ පොලිස් අධිකාරී සේරම් දැනුවත් කර ඇතත් මේ පොලිස් නිළධාරීන්ද උද්දච්ච ආකාරයෙන් හමුදාවේ කරුණු දැක්වීම නොසළකා හැර තිබේ.
කෙසේ වෙතත් හමුදාවට එරෙහිව 2025 ජුනි මස 17 වන දින ගාල්ල පොලීසිය මගින් ගාල්ල මහේස්ත්‍රාත් අධිකරණයේ නඩු පවරන ලද අතර, නඩු වාර කැඳවීම් 06 කින් පසු 2026 සැප්තැම්බර් 07 වන දින එහි තීන්දුව ප්‍රකාශයට පත් කර ඇත.
එහිදී මෝටර් රථ ප්‍රවාහන කොමසාරිස් ගේ නියෝග හා 1955 ජුලි මස 08 වන දින ගැසටි පත්‍රය ප්‍රකාරව යුද හමුදා වාහන වලට ආදායම් බලපත්‍ර අවශ්‍ය නොවන බවට මහේස්ත්‍රාත්වරයාද තහවුරු කර තිබේ.
