සෑම හඬකටම වටිනාකමක් ඇත. හඬක් සොයා යෑමේ කතාව...

සමහර පොත් අපට කතාවක් කියා දෙයි. තවත් සමහර පොත් අපට මිනිසුන්ගේ අත්දැකීම්, අභියෝග සහ ජීවිතය දෙස බලන ආකාරය පිළිබඳ නව දෘෂ්ටිකෝණයක් ලබා දෙයි. තිණුෂ බමුණුආරච්චි විසින් රචිත “I Still Have Something to Say” එවැනි කෘතියකි.

මෙය මුලින්ම කියවීමට අතට ගත් විට කථන අපහසුතාවයක් සමඟ ජීවත් වූ පුද්ගලයෙකුගේ මතක සටහන් ලෙස පෙනී යා හැකිය. එහෙත් ඉදිරියට කියවාගෙන යත්ම පාඨකයාට හමුවන්නේ ඊට වඩා බොහෝ පුළුල් කතාවකි. එය ආත්මවිශ්වාසය ගොඩනැගීම, අභියෝග ජය ගැනීම, ස්වයං සැකය සමඟ සටන් කිරීම, නායකත්වය භාර ගැනීම සහ බාධක මැද ඉදිරියට යාම පිළිබඳ සත්‍ය ජීවිත ගමනකි.

පරිච්ඡේද තිහක් පුරා දිවෙන මෙම කෘතිය තුළින් කතුවරයා පාඨකයා රැගෙන යන්නේ පාසල් පන්ති කාමරවල සිට විවාද වේදිකා දක්වාත්, විශ්වවිද්‍යාල ජීවිතයේ සිට වෘත්තීය ලෝකය දක්වාත්, එතැනින් ජාත්‍යන්තර කථික වේදිකා සහ නායකත්ව භූමිකා දක්වාත් වූ දිගු ගමනක් ඔස්සේ ය.

මෙම කෘතියේ වඩාත්ම වැදගත් අංගය වන්නේ ගොත ගැසීම යනු කෙනෙකුගේ වචන උච්චාරණයේ බාධාවක් පමණක් නොවන බව පාඨකයාට අවබෝධ කර දීමයි. බොහෝ දෙනාට පෙනෙන්නේ එකම වචනය නැවත නැවත පැවසීම හෝ කතාව අතර ඇතිවන නැවතීම් පමණකි. නමුත් ඒ පිටුපස සැඟවී ඇති බිය, ලැජ්ජාව, කලකිරීම, අපේක්ෂාවන් සහ ධෛර්යය පිළිබඳ ගැඹුරු අවබෝධයක් මෙම කෘතිය ලබා දෙයි.

දෙමාපියන් සඳහා මෙම පොත විශේෂයෙන් වැදගත් වේ. කථන අපහසුතාවයක් සහිත දරුවන්ගේ හැඟීම් තේරුම් ගැනීමත්, ඔවුන්ගේ ආත්ම විශ්වාසය වර්ධනය කිරීමේදී පවුලේ සහයෝගය කෙතරම් බලවත්ද යන්නත් මෙම කෘතිය පැහැදිලි කරයි.

ගුරුවරුන්ටද මෙය අගනා කියවීමකි. නිහඬ හෝ කතා කිරීමට අපහසු දරුවෙකුගේ හැකියාවන්, දැනුම සහ කැපවීම ඔහුගේ හෝ ඇයගේ කථන රටාව මත පමණක් මැනිය නොහැකි බව මෙම කෘතිය මතක් කර දෙයි.

රැකියා ස්ථානවල කළමනාකරුවන්ට සහ සහෝදර සේවකයන්ටද මෙය වැදගත් පණිවිඩයක් ගෙන එයි. අදහස් වල වටිනාකම වචනවල සුමට භාවයෙන් පමණක් තීරණය කළ නොහැකි බවත්, සෑම පුද්ගලයෙකුටම දායක විය හැකි අගනා හඬක් ඇති බවත් මෙම පොත පෙන්වා දෙයි.

එසේම ප්‍රසිද්ධ කථනය පිළිබඳ බියක්, චකිතයක් හෝ කථන අපහසුතාවයක් ඇති පුද්ගලයන්ට පමණක් නොව, ජීවිතයේ ඕනෑම අභියෝගයක් හමුවේ ඉදිරියට යාමට උත්සාහ කරන ඕනෑම කෙනෙකුට මෙම කෘතියෙන් දිරිගැන්වීමක් ලැබේ. මෙය පරිපූර්ණත්වය පිළිබඳ කතාවක් නොව, අඩුපාඩු සහ අභියෝග සමඟම ඉදිරියට යාම පිළිබඳ කතාවක් වීම එහි විශේෂත්වයයි.

පාසල් විවාදයකදී කතා කිරීමට අපහසු වූ කුඩා දරුවෙකු, පසුව නායකත්ව භූමිකා භාර ගනිමින් ජාත්‍යන්තර මට්ටමේ කථිකයෙකු බවට පත්වන ආකාරය මෙම කෘතිය තුළින් දැක ගත හැකිය. එය එක්වර ලැබුණු ජයග්‍රහණයක් නොව, කුඩා පියවර රැසකින් ගොඩනැගුණු දිගු සහ අර්ථවත් ගමනකි.

මෙම කෘතිය පාඨකයන්ට ඇති කළ බලපෑම පිළිබඳව ළමා රෝග විශේෂඥ වෛද්‍ය චරිත් සේනානායක්කාර මහතා මෙසේ සඳහන් කරයි.

"I Still Have Something to Say කෘතිය ප්‍රකාශයටපත් කිරීම පිළිබඳව තිණුෂට ස්තූතියි. එක්සත් රාජධානියේ පැවති වාර්ෂික රිච්මන්ඩ් - මහින්ද ක්‍රිකට් තරඟයේදී මෙම පොත මිලදී ගත් මම, එහි පරිච්ඡේද තිහම එකවර කියවා අවසන් කළෙමි."

"ළමා රෝග විශේෂඥ වෛද්‍යවරයෙකු ලෙස, ගොත ගැසීමක් සහිත දරුවන් බොහෝ දෙනෙකු හමුවී ඇති අතර ඔවුන්ගේ දෙමාපියන්ට උපදෙස් ලබා දී ඇත. කෙසේ වෙතත්, මෙම කෘතිය හරහා එවැනි දරුවන් මුහුණ දෙන මානසික සහ චිත්තවේගීය අභියෝග පිළිබඳව මට නව අවබෝධයක් ලැබුණි."

"මෙම කෘතිය සම්පූර්ණයෙන්ම මම ඉතා ආදරයෙන් කියවූවෙමි."

"මෙම කෘතියට සන්නිවේදනය, නායකත්වය සහ ප්‍රසිද්ධ කථිකත්වය පිළිබඳ ලෝකප්‍රසිද්ධ පුද්ගලයන්ගෙන්ද ප්‍රසංසා ලැබී ඇත. Toastmasters International හි හිටපු ජාත්‍යන්තර සභාපති Margaret Page සහ ලෝක රසිද්ධ Public Speaking ශූරතාවය දිනූ Mark Hunter ඇතුළු බොහෝ දෙනා මෙම කෘතියේ අවංක භාවය සහ සමාජයට ලබා දෙන වැදගත් පණිවිඩය අගය කර ඇත."

"අවසානයේ, I Still Have Something to Say යනු කථන අපහසුතාවයක් පිළිබඳ මතක සටහන් කෘතියක් පමණක් නොවේ. එය මනුෂ්‍ය හැකියාව, දරා ගැනීම, නොසැලෙන උත්සාහය සහ තම හඬ ලොවට ඇසීමට ඉඩ දීම පිළිබඳ කතාවකි."

අද සමාජය, බොහෝ විට වැඩිපුර ඇසෙන හඬවලට වැඩි අවධානයක් ලබා දෙන නමුත් මෙම කෘතිය අපට මතක් කර දෙන වැදගත් සත්‍යය නම්,

“සෑම හඬකටම වටිනාකමක් ඇත. සෑම පුද්ගලයෙකුටම පැවසිය යුතු කතාවක් ඇත.” යන්නය.