සලේගේ නඩුවෙන් දිලීපව එළවන්න සැලසුමක්...
රැඳවුම් භාරයේ සිටින රාජ්‍ය බුද්ධි සේවයේ (SIS) හිටපු ප්‍රධානී, විශ්‍රාමික මේජර් ජෙනරල් සුරේෂ් සලේ වෙනුවෙන් පෙනී සිටින නීතීඥයන් පිරිසක් අතිරේක සොලිසිටර් ජනරාල් දිලීප පීරිස්ට එරෙහිව නීතිපති පාරින්ද රණසිංහ වෙත නිල වශයෙන් පැමිණිලි කිරීමට සුදානම් වී ඇතැයි වාර්තා වේ.
මීට හේතු වී ඇත්තේ, සලේ සහ ඔහුගේ නීතිඥයන් අතර සිදුවන සාකච්ඡා අපරාධ පරීක්ෂණ දෙපාර්තමේන්තුවේ (CID) නිලධාරීන්ගේ අධීක්ෂණය යටතේ පැවැත්විය යුතු බවට අතිරේක සොලිසිටර් ජනරාල් දිලීප පීරිස් විවෘත අධිකරණයේදී ප්‍රකාශ කිරීමය.
දිලීප පීරිස්ට එරෙහිව මෙම පැමිණිල්ල සුරේෂ් සලේ වෙනුවෙන් පෙනීසිටින ජනාධිපති නීතිඥ ශවේන්ද්‍ර ප්‍රනාන්දු විසින් මේ වන විටත් නීතිපතිවරයා වෙත වාචිකව සිදු කොට ඇතත්, ඉදිරි දින කිහිපය තුළ ඊට අදාළ නිල ලිඛිත පැමිණිල්ල භාරදීමට නියමිත බව වාර්තා වේ.
සුරේෂ් සලේ ගේ නීතිඥයෝ පෙන්වා දෙන්නේ, නඩු විභාගය අතරතුරදී අතිරේක සොලිසිටර් ජනරාල්වරයා විසින් කරන ලද මෙම ප්‍රකාශය, සැකකරුවන්ගේ මෙන්ම නීතිඥවරුන්ගේ ද වෘත්තීය අයිතිවාසිකම් බරපතළ ලෙස උල්ලංඝනය කිරීමක් බව ය.
නීතිපතිවරයාට අමතරව, ශ්‍රී ලංකා නීතිඥ සංගමය වෙත ද පැමිණිල්ලක් ඉදිරිපත් කිරීමට සලේගේ නීතිඥ පාර්ශ්වය තීරණය කර ඇත.
පාස්කු ඉරිදා ත්‍රස්ත ප්‍රහාරය සම්බන්ධ විමර්ශනවලට අදාළව විශ්‍රාමික මේජර් ජෙනරල් සුරේෂ් සල්ලෙයි මහතා මේ වන විට රැඳවුම් භාරයේ සිටින්නේ ත්‍රස්තවාදය වැළැක්වීමේ පනත (PTA) යටතේ ය.
