මරණ 25 යි. 100 කට තුවාලයි සිද්ධිය පිටුපස කුමන්ත්‍රණයක් ?

මීගමුව බන්ධනාගාරයේ දෙවන දිනයක් අද උදෑසන යළිත් ඇති වූ නොසන්සුන්තාවයෙන් මියගිය සංඛ්‍යාව 25 දක්වා ඉහළ ගොස් තිබේ. එම ගැටුමෙන් පුද්ගලයින් 100 කට ආසන්න සංඛ්‍යාවක් තුවාල ලබා ඇති බව වාර්තා වේ.

ගැටුම්වලින් මියගිය පිරිස අතර රැඳවියන් 20 ක්  සහ බන්ධනාගාර ආරක්ෂක නිලධාරීන් 05 දෙනකු සිටින බව වාර්තා වේ.

පසුගිය ඉරිදා, රිමාන්ඩ් භාරයේ සිටින සහ වරදකරුවන් වූ සිරකරුවන් අතර ගැටුම් ඇති වූ අතර, එහි ප්‍රතිඵලයක් ලෙස රැඳවියන් දෙදෙනෙකු මිය ගොස්  38 දෙනෙකු තුවාල ලැබූහ.

අද දින නැවතත් නොසන්සුන්තාවයක් ඇති වූ අතර, රැඳවියන් සහ බන්ධනාගාර නිලධාරීන් අතර ගැටුම පාලනය කිරීම සඳහා පොලීසිය සිදු කළ වෙඩි තැබීම හේතුවෙන් තත්වය පාලනය කිරීම සඳහා රජය හමුදාව යෙදවූහ.

මුලින්ම බන්ධනාගාරය තුළ රැඳවියන් කණ්ඩායම් දෙකක් අතර ප්‍රචණ්ඩ ගැටුම ආරම්භ වී ඇත්තේ, බන්ධනාගාරය තුළ සිදුවන මත්ද්‍රව්‍ය ජාවාරමක් සම්බන්ධ ආරවුලක් නිසා බව මූලික පොලිස් විමර්ශනවලට අනුව හෙළිවී ඇතැයි පොලීසිය පවසයි. 

කෙසේ වෙතත් මෙම ගැටුම පිටුපස කිසියම් කුමන්ත්‍රණකාරී සැලසුමක් පැවැති බවට වූ තොරතුරු ඇතැයි අනන්‍යතාවය හෙළි නොකරන අපගේ ආරංචි මාර්ග සඳහන් කර සිටී. එම කුමන්ත්‍රණකාරී සැලසුම් ඉදිරියේදී හෙළිදරව් වනු ඇතැයි එම ආරංචි මාර්ග වැඩිදුරටත් සඳහන් කර සිටී.